Lýðræði??

Eftir hamfarir helgarinnar sitja þeir félagar Jón og Geir á bakvið luktar dyr og reyna allt sem þeir geta til að koma sér saman um einhverskonar samkomulag. Þeir munu rembast af öllum mætti ef þeir mögulega geta til að klára málið. Geir vill að sjálfsögðu ekkert frekar en að halda áfram að "starfa með" Framsókn þar sem þeir eru lang þægilegasti og fyrirferðarminnsti flokkurinn sem í boði er - og fyrirferðin minnkar enn!

Sjálfstæðismenn hafa í áraraðir notfært sér Framsóknarflokkinn til að hanga í stjórn stykk frí! Þeir grænu hafa verið afar þægir og ekkert látið fyrir sér fara. þeir hafa einfaldlega hlýtt Sjálfstæðismönnum í einu og öllu, verið blóraböggullinn þeirra og hækja. Nú eru Framsóknarmenn orðnir minni en Vinstri grænir sem hlýtur að segja sitt um hvað þjóðin vill. Hún hefur engan áhuga á að sjá svona flokk í stjórn, enda umræðan á götunni eftir því. Ég hef ekki hitt nokkurn mann sem hefur brennandi áhuga á að hafa Framsókn áfram í stjórn. Margir gamlir harðir Framsóknarmenn horfa sorgaraugum á flokkinn sinn verslast upp en flestir virðast vera löngu búnir að gefast upp á honum hvort eð er og eru farnir að horfa í aðrar áttir.

Staðreyndin er sú að Framsókn hefur ekki staðið sig vel en hangir á bakinu á Sjálfstæðisflokknum sem virðist vera að standa sig mun betur. Þeir lifa einnig á fornri frægð landsbyggðarinnar sem af einhverjum ástæðum virðist sjá eitthvað meira í þeim en aðrir. Ég vil taka fram að Framsókn hefur ágætis stefnuskrá og ef maður hefði ekki horft uppá störf þeirra síðastliðin ár þá hefði maður jafnvel haldið að þarna væri ágætis flokkur á ferð en þeir hafa bara ekki staðið við neitt, enda nánast valdalausir.

Nú hefur þessi svokallaða stjórn aðeins einn mann í meirihluta. Það þarf ekki nema einn fýlupúka til að stöðva öll mál og raska öllu kerfinu. Það er þá eins gott að allir verði hlýðnir og góðir og láti það vera að hafa eigin skoðanir. Engin Sjálfsstæðismaður má því hafa sjálfsstæðar hugsanir og Framsókn verður og mun auðvitað að fylgja þeim (ó)sjálfsstæðu í einu og öllu eins og alltaf, annars er samstarfið í hættu - og hver myndi nú vilja það?

Stóru flokkarnir eru í dag Sjálfsstæðisflokkurinn og Samfylkingin. Ef að lýðræðið væri algjört þá væri hlustað á meirihluta þjóðarinnar og þeir flokkar færu í stjórn. Væri það ekki lýðræðislegasta leiðin að gera kröfu um að stærstu flokkar landsins myndu reyna samstarf áður en annað væri reynt? Með slíku samstarfi mundu flokkarnir vega hvorn annan upp. Þeir myndu takast á um málefnin og komast að málamiðlun. Sjálfsstæðismenn yrðu ekki einráðir í einu og öllu eins og hefur verið heldur þyrftu þeir að berjast fyrir stóriðjustefnunni, peninga og valdagræðginni. Þessir tveir flokkar myndu hafa stóran meirihluta þjóðarinnar á bakvið sig svo ég segi að það sé hreinlega þeirra skylda að skoða þennan möguleika áður en pínulítill gamall bændaflokkur sem nánast enginn vill sjá er settur í stjórnsætið í landinu - þó að vísu bara í aftursætið og fast í góðum bláum sjálfstæðisbílstól

Athugasemdir

[Guðsteinn Haukur Barkarson, 18.5.2007 kl. 08:01]

Sammála, gott að sjá svona vel hugsandi mann. Það er gott að eiga bloggvini sem þig ! Guð blessi þig Stebbi!